மாங்காடு ஸ்ரீ வெள்ளீஸ்வரர் (சுக்ரன் ஸ்தலம்) திருக்கோயில், சென்னை

முகவரி

மாங்காடு ஸ்ரீ வெள்ளீஸ்வரர் (சுக்ரன் ஸ்தலம்) திருக்கோயில் மாங்காடு – 602 101 காஞ்சிபுரம் மாவட்டம், சென்னை, தொலைபேசி: +91 44 2627 2053 / 2649 5883 மொபைல்: +91 94444 61383

இறைவன்

இறைவன்: வெள்ளீஸ்வரர் / சுக்ரீஸ்வரர் / பார்கவீஸ்வரர்

அறிமுகம்

வெள்ளீஸ்வரர் கோயில் தமிழ்நாட்டில் சென்னை மாங்காடு என்ற இடத்தில் சிவபெருமானுக்கு அர்ப்பணிக்கப்பட்டுள்ளது. இந்த கோவில் மாங்காடு காமாட்சி அம்மன் கோவிலுக்கு மிக அருகில் அமைந்துள்ளது. மூலவர் வெள்ளீஸ்வரர் / சுக்ரீஸ்வரர் / பார்கவீஸ்வரர் என்று அழைக்கப்படுகிறது. இக்கோயிலில் இறைவி இல்லை, ஏனெனில் அவர் அருகிலுள்ள தனி கோவிலில் (காமாட்சியாக) இருக்கிறார். இது 2 ஏக்கர் பரப்பளவில் நடுத்தர அளவிலான கோயில். இக்கோயில் 1000 ஆண்டுகள் பழமையானது என நம்பப்படுகிறது. காமாக்ஷி அம்மன் கோயிலுக்குச் செல்பவர்கள் மாங்காடு வெள்ளீஸ்வரர் கோயில் மற்றும் வைகுண்டப் பெருமாள் கோயிலிலும் தரிசனம் செய்ய வேண்டும், ஏனெனில் இந்த மூன்று கோயில்களும் காமாக்ஷி அம்மனின் வரலாற்றுடன் ஒன்றோடொன்று தொடர்புடையவை. இக்கோயில் தமிழ்நாடு அரசின் இந்து அறநிலை துறையால் நிர்வகிக்கப்படுகிறது. இக்கோயில் சென்னையின் நவக்கிரக கோயில்களில் (அல்லது தொண்டை மண்டலம்) சுக்ரன் ஸ்தலம் ஆகும். ஸ்ரீ சுக்ரன் மக்களுக்கு செல்வம், செழிப்பு, நல்ல குடும்பம், வாகனங்கள், புகழ் மற்றும் சமூக அந்தஸ்தை வழங்குகிறார்.

புராண முக்கியத்துவம்

கைலாயத்தில் ஒருசமயம் சிவன், தனித்து அமர்ந்திருந்தார். அப்போது அவரிடம் வந்த அம்பிகை, விளையாட்டாக அவரது கண்களை மூடினாள். இதனால், உலகம் இருளில் மூழ்கியது. எனவே, அம்பிகை மீது கோபம்கொண்ட சிவன் அவளை பூலோகத்தில் பிறக்கும்படி சாபம் கொடுத்துவிட்டார். அம்பிகை, தவறை மன்னித்து அருளும்படி சிவனிடம் வேண்டினாள். அவர் பூலோகத்தில் இத்தலத்தில் தவமிருந்து வழிபட, குறிப்பிட்ட காலத்தில் திருமணம் செய்து கொள்வதாக கூறினார். அதன்படி அம்பிகை இத்தலத்திற்கு வந்து பஞ்சாக்னியில் நின்று தவம் செய்தார். அவளுக்கு அருள்புரிவதற்காக சிவன், இத்தலத்திற்கு வந்தார். இதனிடையே, சுக்கிராச்சாரியாரும் இத்தலத்தில் தவம் செய்து கொண்டிருந்தார். மகாபலி சக்கரவர்த்தியை ஆட்கொள்வதற்காக, வாமனராக குள்ள அவதாரம் மகாவிஷ்ணு, மகாபலியிடம் தானம் கேட்டு சென்றார். அவனிடம் மூன்றடி வேண்டும் என்றார். அவரும் ஏற்றுக்கொண்டார். அப்போது அவரது குலகுருவான சுக்ராச்சாரியாருக்கு, வந்திருப்பது திருமால் என்று தெரிந்து விட்டது. எனவே, மகாபலியிடம் தானம் தர வேண்டாம் என்று தடுத்தார். ஆனால், மகாபலி கொடுத்த வாக்கை மீறமாட்டேன் என சொல்லி அவர் கூறியதை கேட்கவில்லை. அவன் திருமாலுக்கு மூன்றடியை கொடுப்பதற்காக, தாரை பாத்திரத்தை எடுத்தார். மனம் பொறுக்காத, சுக்ராச்சாரியார் வண்டு வடிவம் எடுத்து தாரை பாத்திரத்தில் நீர் வெளியேறும் துளையை அடைத்தார். அப்போது வாமனராக வந்த திருமால், ஒரு தர்ப்பை புல்லை எடுத்து சுக்ராச்சாரியாரின் கண்ணில் குத்தினார். அதன்பின் மூன்றடியில் மூன்று உலகையும் அளந்தார். இவ்வாறு கண் பார்வை இழந்த சுக்ராச்சாரியார் மீண்டும் பார்வை கிடைக்க, இத்தலத்தில் சிவனை வேண்டி தவமிருந்தார். அம்பிகைக்கு காட்சி கொடுக்க வந்த சிவன், முதலில் சுக்ராச்சாரியாருக்கு காட்சி கொடுத்தார். அப்போது அவர் சிவபூஜை செய்யவே, சிவனால் இங்கிருந்து செல்ல முடியவில்லை. எனவே, இங்கிருந்தபடியே அம்பிகையிடம் அசரீரியாக காஞ்சிபுரத்தில் தவம் செய்யும்படியும், அங்கு தான் காட்சி தருவதாகவும் கூறினார். அதன்படி அம்பிகையும் காஞ்சிபுரம் சென்று தன் தவத்தை தொடர்ந்து, பின் சிவனருள் பெற்றாள். சுக்ராச்சாரியாருக்கு காட்சி தந்த சிவன் இங்கு எழுந்தருளினார்.

நம்பிக்கைகள்

கண் பார்வை குறைபாடு உள்ளவர்கள் சிவன், அம்பிகைக்கு பூஜை செய்து வேண்டிக்கொள்கிறார்கள்.

சிறப்பு அம்சங்கள்

இக்கோயிலில் சிவன், சதுர பீடத்துடன் அருளுகிறார். துவாரபாலகர்கள் கிடையாது. சுக்ராச்சாரியாருக்கு (வெள்ளி என்றும் பெயருண்டு) காட்சி தந்தால் இங்கு சிவன், “வெள்ளீஸ்வரர்’ என்ற பெயரிலேயே அருளுகிறார். பார்க்கவேஸ்வரர் என்றும் இவருக்கு பெயருண்டு. இவருக்கான அம்பாள், மாங்காடு தலத்தில் இருக்கிறாள். எனவே, காஞ்சிபுரம் போலவே இங்கும் அம்பிகை சன்னதி கிடையாது. சுவாமி சன்னதி எதிரே, அம்பாள் பாதம் மட்டும் இருக்கிறது. இங்கு சுவாமியிடம் வேண்டிக்கொள்பவர்கள், சன்னதி எதிரே தேங்காய் தீபம் ஏற்றி வழிபடுகிறார்கள். விவசாய விநாயகர்: முன் மண்டபத்தில் இருக்கும் விநாயகர் மிகவும் விசேஷமானவர். இவர் இடது மேல் கையில் நெற்கதிரும், கீழ் கையில் மாங்கனியும் வைத்திருக்கிறார். விவசாயிகள் இவரிடம் மாங்கனி, நெல் நைவேத்யமாக படைத்து வழிபடுகிறார்கள். இதனால், விவசாயம் செழிப்பதாக நம்பிக்கை. கோஷ்டத்தில் உள்ள மற்றொரு விநாயகர் கையில் குடை, சாமரம் வைத்து நின்ற கோலத்தில் இருக்கிறார். இவ்வாறு இத்தலத்தில் இரண்டு வித்தியாசமான விநாயகர்களை தரிசிக்கலாம்.