களப்பால் அழகியநாத சுவாமி திருக்கோயில், திருவாரூர்

முகவரி

களப்பால் அழகியநாத சுவாமி திருக்கோயில், களப்பால், நடுவக்களப்பால் அஞ்சல், திருத்துறைப்பூண்டி (வழி), மன்னார்குடி வட்டம், திருவாரூர் மாவட்டம் – 614710.

இறைவன்

இறைவன்: அழகியநாத சுவாமி / ஆதித்தேச்சுரர் இறைவி: பிரபா நாயகி

அறிமுகம்

களப்பால் அழகியநாத சுவாமி கோயில் திருவாரூர் மாவட்டத்தில் உள்ள களப்பால் என்னுமிடத்தில் உள்ள தேவார வைப்புத்தலமாகும். திருவிசைப்பா திருப்பல்லாண்டு திருத்தலங்களில் ஒன்று என்னும் பெருமையையுடையது. திருத்துறைப்பூண்டி-மன்னார்குடி சாலையில் 3 கிமீ அடுத்து மடப்புரம் உள்ளது. மடப்புரத்தின் இடப்புறம் வழியாக சென்றால் களப்பாலை அடையலாம். களப்பாளர் கோத்திரத்தைச் சேர்ந்தவர்கள் வாழ்ந்த ஊராதலின் இப்பெயர் பெற்றிருக்க வேண்டும். இது மருவி களந்தை என்றாயிற்று. இக்கோயில் விஜயாலய சோழனின் மகன் ஆதித்தசோழன் (கி.பி. 850 – 890) கட்டுவித்தது. எனவே ஆதித்தேச்சரம் என்று பெயர் பெற்றது. இங்குள்ள இறைவன் அழகியநாத சுவாமி என்றும் ஆதித்தேச்சுரர் என்றும் அழைக்கப்படுகிறார். இறைவி பிரபா நாயகி ஆவார். களப்பால் கூற்றுவ நாயனார் அவதரித்த தலமாகும். இஃது சுந்தரர் வாக்கில் இடம்பெற்ற சோழ நாட்டு வைப்புத் தலமுமாகும்.